Во средината на 2009 година во Куманово силно блесна на музичкото небо Тамбурашката група, ”ГЕЗМЕ”.
Во неа не случајно се најдоа инзвонредните музичари, една “златна” четворка во едноставна постава: Сашо Спасовски, маестро на жичени инструменти, еден од најдобрите прим мајстори во Македонија, Горан Михајловски, гитарист и вокал, докажан инструменталист со две – децениско музицирање, Сашо Димковски, перфекционист на бас прим и Игор Марковски, контрабасист, проверен и докажан музичар кој преку неговиот инструмент и дава и душа и ритам на секоја песна.
          Жиците под прстите на Тамбурашката група ”ГЕЗМЕ” од тогаш започнаа да произведуваат до перфекција најубави тонови, нежни музички ноти, песни мевлем за душа и срце.
          Овој мал музички состав, со голема умешност во музицирањето, ги освои љубителите на песната исполнувајќи пред се, стари и незаборавни македонски песни, а со иста љубов и едноставна посебност понудија богат репертоар на песни од сите жанрови од поранешните југословенски простори. Сигурни во себе се осмелија и со голем успех ги изведуваат и најголемите светски музички хитови во една сосема нова верзија прифатлива за секој љубител на песната.
          Тамбурашката група ”ГЕЗМЕ” секогаш на публиката и нуди лесен и прифатлив напев, песни љубовни, интимни, елегични и носталгични, песни што кај секој ја радуваат душата.
          Она што е карактеристично во изведбата на Тамбурашката група ”Гезме”, е тоа што секогаш внимаваат на заедничкото помеѓу мелодијата и текстот и имаат одлична аранжерска подлога давајќи една логична целина на мелопоетскиот израз. Токму затоа песните што тие ги исполнуваат се лепат за душата, тоа се песни што ги будат спомените, а со тоа секој кој ги слуша се чувствува пријатно, опуштено и расположено, тоа се песни кои успокојуваат враќајќи не во минатото, песни низ кои насмевката е широка, срцето полно и топло, љубовта највозвишена.